Tre ppiccerille,
sott’ a nu mbrello:
duje bruttulille,
n’ ato cchiù bello,
cchiù strappatiello,
purtav’ ‘o mbrello
a rras’ ‘ e cappiello.
Tre suricille,
tre mappatelle,
tre ricciulille:
sei scarpetelle.
Sei scarpetelle
Ch’ ‘e chiuvetielle,
ch’ ‘e ffettuccelle,
ch’ ‘e ppurtuselle.
P’ ‘o vecariello,
porte e putrelle:
c’ ‘o zumpetiello
‘a sbutecatella…
Quanta reselle,
quanta resile,
ch’ ‘e llavarelle
ncopp’ ‘ e mussille!
Tre suricille:
Tre mappatelle.
Tre strummulille,
Sei scarpetelle…
Chillu cchiù bello,
cchiù strappatiello,
purtav’ ‘o mbrello
a rras’ ‘ e cappiello.

(Eduardo De Filippo)